Furmaziun per in Svilup Persistent

La Fundaziun éducation21 coordinescha e promova la Furmaziun per in svilup persistent (FSP) en Svizra. Ella fa quai per incumbensa da la Conferenza svizra da las directuras e dals directurs chantunals da l'educaziun publica (CDEP), da la Confederaziun e da la societad civila sco center da cumpetenza naziunal per la scola populara ed il stgalim secundar II.

Dapi il 1. da schaner ha la Furmaziun per in svilup persistent (FSP) en Svizra in'identitad: éducation21. Per incumbensa dals chantuns, da la Confederaziun e da la societad civila sustegna éducation21 la realisaziun e la lavur cuntinuanta da la FSP. Ella remplazza la Fundaziun per la furmaziun ed il svilup (FFS) e la Fundaziun svizra per l'educaziun ambientala (FEA) cun lur accents "emprender cun in'avischinaziun globala" ed "educaziun ambientala". Ella s'occupa ultra da quai era da secturs sco la sanadad, la furmaziun politica incl. ils dretgs umans e l'economia. éducation21 vul gidar a preparar ils uffants e giuvenils per in mund adina pli cumplex. Ella sa referescha al svilup dal plan d'instrucziun che persequitescha la medema finamira cun l'integraziun da la FSP.

La nova fundaziun éducation21 s'engascha sco center da servetschs naziunal sin nivel svizzer, linguistic-regiunal, chantunal e scolastic. Ella porscha a persunas d'instrucziun, direcziuns da scola ed ad ulteriurs acturs meds d'instrucziun controllads pedagogicamain, orientaziuns e cussegliaziuns sco er agids finanzials per projects da scola e da classa. Sin il champ da la scolaziun e dal perfecziunament da scolastas e scolasts collavura éducation21 cun las scolas autas da pedagogia e cun autras instituziuns da furmaziun.

Var 40 collavuraturas e collavuraturs prestan la lavur da la fundaziun. Ils teams dad éducation21 èn cumponids a moda interdisciplinara e disponan da vastas raits cun ils acturs da la FSP sin tut ils nivels dal sistem da furmaziun e da la societad civila. La finanziaziun vegn garantida tras contribuziuns da la Confederaziun, dals chantuns e da la societad civila sco era tras agens meds finanzials recaltgads.

 

 

Kontakt

Jürg Schertenleib
Direktor
tel +41 31 321 00 21
email